نئی وفاقی حکومت سے گلگت بلتستان کے عوام کی توقعات

 

گلگت بلتستان کے بیس لاکھ عوام کو ساٹھ سالوں سے جس حالت میں رکھا گیا ہے اس کی وجہ سے یہ بے بس لوگ آنے والی ہر حکومت سے یہ توقع قائم کر لیتے ہیں کہ وہ انہیں محرومیوں کی دلدل سے نکالے گی لیکن ان مظلوموں کی یہ توقع پوری کرنے کی کسی حکومت نے سنجیدہ کوشش نہیں کی۔ 70ء کی دہائی میں پاکستان پیپلز پارٹی کے بانی چیئرمین اور ملک کی پہلی منتخب عوامی جمہوری حکومت کے وزیراعظم ذوالفقار علی بھٹو شہید نے پہلی بار گلگت بلتستان کے عوام کی محرومیوں اور ان پر ڈھائے جانے والے مظالم کا احساس کرتے ہوئے اس خطے پر توجہ دی اور ایف سی آر جیسے انسانی حقوق کے منافی قانون کا خاتمہ کیا۔ بھٹو شہید کو زیادہ مہلت نہیں ملی اور وہ یہاں کے عوام کی محرومیوں کے مکمل خاتمے کے مشن کو مکمل نہ کر سکے۔ بھٹو کو اپنا محسن مانتے ہوئے گلگت بلتستان کے عوام نے بدترین حالات میں بھی پیپلز پارٹی کا ساتھ نہیں چھوڑا اور شمالی علاقہ جات کونسل ہو یا قانون ساز کونسل ہمیشہ قابل ذکر تعداد میں پیپلز پارٹی کے ٹکٹ یافتہ امیدواروں کو ایوان میں پہنچایا جو اس بات کا ثبوت ہے کہ لوگوں نے پیپلز پارٹی سے گہری توقعات وابستہ کر رکھی ہیں اور انہیں یقین ہے کہ جب بھی پیپلز پارٹی مرکز میں مضبوط حکومت بنائے گی تو گلگت بلتستان کے عوام کی محرومیوں کا خاتمہ کر دے گی۔ آج پیپلز پارٹی کے امتحان کا دن آ گیا ہے۔ مرکز میں پیپلز پارٹی کی حکومت قائم ہو چکی ہے اور پیپلز پارٹی کے وزیراعظم کو پارلیمانی تاریخ میں پہلی مرتبہ تین چوتھائی اکثریت سے منتخب کیا گیا ہے۔گلگت بلتستان کے آئینی حقوق کے حوالے سے چند باتیں بڑی واضح ہیں لہٰذا ان پر بحث مباحثہ کی یہاں گنجائش نہیں۔ تنازعہ کشمیر کا بنیادی فریق اور حصہ ہونے کے باعث اس علاقے کو پاکستان کا صوبہ یا کسی اور صورت میں مملکت کا حصہ بنانا ممکن نہیں۔ اس حوالے سے تمام مطالبات کم علمی پر مبنی ہیں۔ گلگت بلتستان کی اصل پوزیشن صرف اس بات کی اجازت دیتی ہے کہ اس علاقے کو آزاد کشمیر طرز کا سیٹ اپ دیا جا سکتا ہے لیکن باشعور عوام اس طرز کے سیٹ اپ کے خواہاں نہیں ہیں کیونکہ آزاد کشمیر کی صورتحال سے یہ بات واضح ہے کہ وہاں کے معاملات بھی پاکستان کی سول وفوجی بیوروکریسی کے ہاتھ میں ہیں۔ گلگت بلتستان کے عوام ایک آزاد ا ور خود مختار اسمبلی کے متمنی ہیں اور اپنی آزادانہ حیثیت کو برقرار رکھنا چاہتے ہیں۔ اقوام متحدہ کی قراردادوں کے مطابق مسئلہ کشمیر کے فریق کی حیثیت سے یہ وہ واحد صورت ہے جسے خطے کے تمام سنجیدہ اور بااثر حلقوں کی تائید حاصل ہے جبکہ ایک آزاد اسمبلی والی بااختیار حکومت کا قیام پاکستان کے اپنے قومی مفاد میں بھی ہے کیونکہ پہاڑوں سے نیچے اترنے کا ہر راستہ پاکستان کی طرف جاتا ہے۔ پیپلز پارٹی کی حکومت یہ سب کچھ کر سکتی ہے اور اسی لئے بیس لاکھ عوام ان سے توقعات وابستہ کئے ہوئے ہیں۔ عوام یہ بھی چاہتے ہیں کہ انہیں تنازعہ کشمیر میں محض قربانی کا بکرا نہ سمجھا جائے بلکہ ان کی مسلمہ حیثیت کو تسلیم کرتے ہوئے مسئلہ کشمیر کے ہر معاملے میں پوری طرح شریک کیا جائے۔ پاک بھارت مذاکرات میں کشمیریوں کو نمائندگی دینے کے مرحلے میں گلگت بلتستان کی حقیقی قیادت کو بھی شامل کیا جائے۔ بالخصوص قوم پرست جماعتوں کو اعتماد میں لئے بغیر کوئی فیصلہ یا اقدام درست نہیں ہو گا۔ صدر پرویز مشرف نے اپنے آٹھ سالہ دور اقتدار کے آخری ایام میں ایک سیاسی پیکیج دیکر لوگوں کو بہلانے کی کوشش کی جس کا شدید ردعمل سامنے آیا اور خود صدارتی کیمپ کے حمایتی آج اس پیکیج کی برائی کر رہے ہیں۔ اس پیکیج کے تحت لوگوں کو یہ دھوکہ دیا گیا کہ انہیں بااختیار بنایا جا رہا ہے لیکن اصل صورتحال یہ ہے کہ اختیارات بدستور بیوروکریسی اور پاکستان کی حکومت نے اپنے ہاتھ میں رکھے ہوئے ہیں۔ چیف ایگزیکٹو کی جگہ وفاقی وزیر کو چیئرمین بنا کر تمام اختیارات اسے منتقل کر دیئے گئے ہیں ۔ پیپلز پارٹی سے عوام کو توقع ہے کہ وہ اس دھوکے کا ازالہ کرے گی اور قانون ساز اسمبلی کو واقعی بااختیار بنائے گی۔ چیئرمین جیسے کسی عہدے کی کوئی گنجائش نہیں۔ اختیارات کا اصل منبع اسمبلی ہونی چاہیے جو اس خطے کے اصل چیف ایگزیکٹو کا خود چنائو کرے ، جو تمام انتظامی اور مالیاتی اختیارات استعمال کر سکے گا۔ کوئی فائل بھی اسلام آباد بھیجنے کی ضرورت باقی نہیں رہنی چاہیے۔ چیف سیکرٹری سمیت تمام محکموں کے سربراہان مقامی افراد ہونے چاہئیں۔ اگر دوسرے صوبوں سے افسران کو چیف سیکرٹری یا محکمے کا سربراہ بنا کر یہاں بھیجا جائے تو یہاں کے افسران کو بھی کسی صوبے کا چیف سیکرٹری یا محکمے کا سربراہ بنایا جانا چاہیے۔ پیپلز پارٹی کی حکومت کی ایک ذمہ داری یہ بھی ہے کہ وہ عوامی توقعات کے عین مطابق اس خطے میں انسانی حقوق کی سنگین خلاف ورزیوں کا سلسلہ بند کرائے۔ ہم سمجھتے ہیں کہ سیاسی سیٹ اپ کو مضبوط کئے بغیر ایسا ممکن نہیں۔ عوام کو خدشہ ہے کہ ماضی میں ہر غیر جمہوری اور کھوکھلے سیٹ اپ کا حصہ بننے والوں کو وفاداریاں تبدیل کرنے پر دوبارہ ان پر مسلط نہ کر دیا جائے۔پیپلز پارٹی پر گلگت بلتستان کے عوام کا یہ قرض ہے کہ وہ اپنے شہید چیئرمین کے مشن کو مکمل کرے۔

آزاد کشمیر کی نام نہاد حکومت سے توقع رکھنا فضول ہے؟

 

پاکستان کے زیر کنٹرول آزاد کشمیر حکومت کے قیام سے کشمیریوں کو بڑاحوصلہ ملا تھا اور انہیں یہ امید تھی کہ ریاست جموں و کشمیر کا یہ آزاد ٹکڑا حقیقی معنوں میں آزاد ہو گا اور تحریک آزادی کا بیس کیمپ ثابت ہو گا لیکن اس امید کو وقتاً فوقتاً دھچکے لگتے رہے۔ ریاست جموں و کشمیر کا یہ منقسم ٹکڑا بھی پاکستانی سیاستدانوں کی سیاسی شعبدہ بازی کا نشانہ بنتا رہا۔ تحریک آزادی کا بیس کیمپ بننا تو درکنار اس حصے پر قائم ہونے والی ہر حکومت نے کشمیریوں کی امیدوں پر پانی پھیرا۔ پاکستانی حکومت بھی اس ٹکڑے کو محض اپنی عالمی سیاست کیلئے اوزار کے طور پر استعمال کرتی رہی اور کر رہی ہے۔ آزاد کشمیر حکومت کے قیام سے کشمیریوں کو ایک حوصلہ ملا تھا اور انہیں توقع تھی کہ یہ ٹکڑا ان کی اجتماعی آزادی، معاشی خوشحالی اور عزت و آبرو کا محافظ ثابت ہو گا لیکن 8 اکتوبر کے زلزلے میں اغواء ہونے والی لڑکیوں سے جسم فروشی کا دھندا کروائے جانے کے انکشاف کے بعد کشمیریوں میں نفرت کی شدید لہر پیدا ہوئی ہے۔ اس انتہائی شرمناک واقعے کے بعد نام نہاد ریاستی حکومت اور پاکستانی حکمرانوں کی چشم پوشی نے رہی سہی کسر بھی پوری کر دی۔ ضلع باغ سے تعلق رکھنے والی لڑکی کسی طرح بھاگ کر گھر پہنچ گئی۔ اس مظلوم لڑکی نے انکشاف کیا کہ مزید چار لڑکیاں اس جسم فروشی کے اڈے پر قید ہیں جہاں سے وہ بھاگ کر آئی ہے۔ تمام معلومات ملنے کے باوجود ریاستی حکومت اور حکومت پاکستان نے کوئی ٹھوس اقدامات نہیں کئے اور تاحال لڑکیاں بازیاب نہیں کرائی جا سکیں۔ اس واقعے کے خلاف آزاد کشمیر سمیت پاکستان کے مختلف شہروں میں احتجاجی مظاہرے کئے گئے۔ عالمی سطح پر بھی اس معاملے کو اٹھایا گیا لیکن لڑکیاں بازیاب نہ ہو سکیں۔ نام نہاد آزاد کشمیر حکومت کے وزیراعظم نے اس واقعے کی پردہ پوشی کیلئے جنیوا میں انسانی حقوق کے حوالے سے کانفرنس میں اپنے بیٹے کو چند خواتین کے ہمراہ انسانی حقوق تنظیم کا نمائندہ وفد بنا کر بھیج دیا لیکن عالمی برادری کی آنکھوں میں دھول نہ جھونکی جا سکی۔ جعلی وفد کو کانفرنس میں شرمندگی کا سامنا کرنا پڑا اور حکومت پاکستان کی سخت بدنامی ہوئی۔ اس نامعقول دورے پر اٹھارہ لاکھ روپے کا کثیر سرمایہ خرچ ہوا۔ کتنے دکھ کی بات ہے کہ زلزلے جیسے ہولناک موقع پر بھی لڑکیوں کے اغواء کی وارداتیں ہوتی رہیں۔ لوگ اپنی لاتعداد لاپتہ بچیوں کے بارے میں یہ گمان رکھتے ہیں کہ وہ ملبے تلے دب کر شہید ہو گئی ہیں اور نعشیں نکالنا ممکن نہیں لیکن اب ہر لاپتہ بچی کے والدین پر قیامت گزر رہی ہے کہ خدانخواستہ ان کی بیٹی بھی پاکستان میں جسم فروشی کے کسی اڈے کی زینت نہ بن گئی ہو۔ دوسری جانب ریاست جموں و کشمیر کے ہر فرد کو یہ پیغام مل گیا ہے کہ آزاد کشمیر میں بھی ان کی عزت و آبرو اتنی ہی غیر محفوظ ہے جتنی ریاست کے دیگر حصوں میں غیر محفوظ ہے۔ کشمیریوں کو یہ بھی معلوم ہو گیا ہے کہ اپنے تئیں کشمیریوں کی وکالت کرنے کا دعویدار پاکستان حکومتی اور عوامی سطح پر کشمیریوں سے کوئی لگائو نہیں رکھتا۔ انہیں کشمیریوں کے حقوق، آزادی اور عزت و آبرو کے تحفظ سے کوئی دلچسپی نہیں۔ سب سے خطرناک بات یہ ہے کہ آزاد کشمیر کی نام نہاد حکومت نہ صرف کشمیریوں کا تحفظ کرنے میں ناکام ہے بلکہ ہر خرابی پر اس کی پردہ پوشی کرنے کا جرم بھی کرتی ہے۔ایسی حکومت سے کوئی توقع رکھنا فضول ہے۔

فوج اور عوام کو ایک بنانے کی تجویز

 

پاک فوج کے سربراہ جنرل اشفاق پرویز کیانی نے کمان سنبھالتے ہی فوج کا رخ اس کے اصل مشن کی طرف واپس موڑ دیا ہے اور واضح طور پر پیغام دیا ہے کہ فوج سیاست سمیت کسی بھی ایسے معاملے میں ہرگز ملوث نہیں ہو گی جو اس کے قیام کے مقاصد اور مشن سے ہٹ کر ہو۔ اس حوالے سے انہوں نے سب سے پہلے سول اداروں میں تعینات فوجی افسران اور اہلکاروں کو واپس بلانے کا حکم جاری کیاجس کے تحت جون 2008ء تک تمام سول اداروں سے فوجی افسران کی واپسی مکمل ہو جائے گی۔ پاکستان سمیت گلگت بلتستان کے عوام نے اس فیصلے کو بے حد سراہا ہے۔پاکستان کے قیام کے بعد سے یہ بدقسمتی چلی آ رہی ہے کہ فوج کو ہمیشہ سیاست میں گھسیٹا گیا اور بات یہیں تک محدود نہیں رہی بلکہ فوج کو ایک ایسی سرکاری لمیٹڈ کمپنی میں تبدیل کر دیا گیا جو کنسٹرکشن، امپورٹ ایکسپورٹ سمیت متعدد تجارتی کام کر رہی ہے۔ اس حوالے سے ہمیشہ یہ کہا جاتا رہا کہ فوج جتنے امور بھی انجام دے رہی ہے ان سب کا تعلق دفاع وطن سے ہے۔ صورتحال یہاں تک پہنچ چکی ہے کہ فوج اور عوام دو مختلف طبقات میں تبدیل ہو چکے ہیں اور ہر طبقہ اپنے اپنے مفادات کے حصول میں مصروف ہے۔ فوج کے ذیلی اداروں نے یوریا کھاد بنانے کی فیکٹریاں تک بنا رکھی ہیں اور اس کا جواز یہ پیش کیا جاتا ہے کہ شہداء اور معذور اہلکاروں سمیت سابق فوجیوں کے اہل خانہ کی دیکھ بھال اور فلاح و بہبود کیلئے یہ امور انجام دیئے جا رہے ہیں۔ اس رویے نے فوج اور عوام میں زبردست دوریاں پیدا کر دی ہیں۔ اس کا ایک نقصان تو یہ ہوا کہ ہر طرف فوج کی اجارہ داری دیکھ کر عوام میں بدگمانیوں نے جنم لیا اور دوسری طرف عوام فوج کو اپنے سے الگ محسوس کرتے ہوئے اس کی تمام تر ذمہ داریوں سے الگ ہو گئے۔ نئے آرمی چیف کے حوالے سے معتبر ذرائع نے اطلاع دی ہے کہ پاک فوج کی اعلیٰ قیادت فوج کو اس کے اصل دائرہ کار میں لانے کے لئے سرے دست عوامی خدمات سر انجام دینے والے دو فوجی اداروں فرنٹیئر ورکس آرگنائزیشن(ایف ڈبلیو او) اور سپیشل کمیونیکیشن آرگنائزیشن(ایس سی او) کو مکمل سول ادارے بنانے کے حوالے سے تجویز پر غور شروع کر دیا ہے۔ ایف ڈبلیو او تو پورے ملک میں بڑے بڑے تعمیراتی کام کرتی ہے اور خاص طور پر سڑکوں، بڑے پلوں اور ڈیم وغیرہ کی تعمیر میں خاصی شہرت رکھتی ہے اور کھربوں روپے کے ٹھیکے اسی ادارے کو دیئے جاتے ہیں۔ ایس سی او کا دائرہ کار آزاد کشمیر اور گلگت بلتستان تک محدود ہے۔ یہ دونوں علاقے آئینی طور پر پاکستان کا حصہ نہیں ہیں اور متنازعہ خطوں میں شمار ہوتے ہیں۔ گلگت بلتستان تو اپنی پسماندگی اور غربت و بیروزگاری کے حوالے سے دنیا میں سرفہرست ہیں۔ پاک فوج کے دونوں ذیلی اداروں کو سول ادارے بنانے سے اس خطے کے عوام کی محرومی میں بڑی حد تک کمی ہو گی۔ ہزاروں کی تعداد میں مقامی افراد کو مستقل ملازمتیں ملیں گی جس سے گھر گھر خوشحالی آئے گی۔ گلگت بلتستان کے عوام فوج کی اعلیٰ قیادت بالخصوص چیف آف آرمی سٹاف جنرل اشفاق پرویز کیانی کے اس فیصلے کو خراج تحسین پیش کریں گے۔ اس متوقع فیصلے سے فوج اور عوام میں دوریاں ختم ہو جائیں گی اور عوام جو کسی بھی مملکت کی اصل اساس ہوتے ہیں فوج کو اپنا لازمی حصہ سمجھتے ہوئے اس کی تمام تر ذمہ داریاں پوری کرنے میں خوشی محسوس کرینگے۔ پھر واقعی کہا جا سکے گا کہ فوج اور عوام ایک ہیں۔